بمجرد ما جوزك يقولك "بحبك" تبتدي تشكي فيه قوام، وده بيرجع للثقافة الموروثة عندنا إن الراجل مايقولش كلام حلو إلا إذا كان عامل عاملة، والعاملة سودا كمان وللأسف ده إعتقاد عن الست المصرية بالخصوص، لأنها في الحقيقة مابتبقاش متعودة على جوزها بكده، فبتشك فيه قوام، وتبتدي تفتكر كلام الافلام والمسلسلات و "ياما تحت السواهي دواهي" والكلام اللطيف اللي من النوع ده، لحد ماتلاقي نفسها في الآخر فتحت على نفسها أبواب جهنم، وممكن تكون بدأت تهدم بيتها بإيدها.
أسباب منطقية : ليه جوزك يقولك بحبك من غير سبب؟؟
- الراجل ممكن يقول لمراته بحبك لو كان مبسوط.
- الراجل ممكن يقول كلام حلو لو عرف إن مراته دي إنسانه عظيمة وشايلاه طول الوقت في الحلوة والمرة.
- الراجل ممكن يقول كلام حلو ويقول لمراته بحبك لو بيلعب بديله فعلاً وبيغطي على أي عاملة سودا.
- الراجل ممكن يقعد مع حد يخليه يقول كلام حلو، لما يعرفه أهمية الكلام الحلو لمراته.
- الراجل التقيل إللي أصلاً بيحب مراته من تحت لتحت ولكن مش بيعبر، فلما يتشجع ويقولها بتشك فيه.
↚
سيبك من أي حد يقولك تعرفي أزاي إن جوزك بيخونك أول ما يقولك بحبك :
دايماً بتتعرض الستات لأفكار غريبة وعجيبة، وعقلها يودي ويجيب ويروح في داهية أول ما تلاقي أي تغير إيجابي على جوزها، هو إيجابي بس هي شايفاه عكس كده، وده شيء مزعج للراجل إنه يلاقي مراته بتقابل الكلام الحلو اللي المفروض إنها مستنياه وبتستناه بجفاء، الراجل ده ممكن يُحبط أحباط شديد جداً لما يلاقي الإنجاز من وجهة نظره وقع في الأرض وعلى الأرض، وبيولد جوه الراجل أفكار كتيرة، هي ليه مش بتحس، هي ليه مش بتتفاعل مع كلامي، تصدقي أنا غلطان إني عبرتك بكلمة حلوة.
وفي النهاية تلاقي الست بتبعد عن جوزها أكتر وتشك فيه أكتر مع إنها المفروض تتبسط أن جوزها بدأ يتغير للأحسن، والكلام اللي بتتنشق عليه بقى متاح وبتسمعه، ولا هو لازم النكد يعني؟؟ وليه الست بتحاول وبتثبت دايماً إن الست نكدية؟؟ فلازم كل الستات تخللي بالها من النقطة دي كويس وتراعي إن جوزها بيمر بظروف صعبة من كل إتجاه خصوصاً في الوقت الحالي لصعوبة المعيشة والطلبات الكتير وخلافه، فلما تلاقيه جاي يفك بكلمتين وعايز رد حلو منك ماتقابليش كل ده بجفاء وإستنكار لعمل حلو، إنتي قالبتيه جوه عقلك لشيء سلبي وظن سوء.
تعليقات: 0
إرسال تعليق