وصفات دودي
مين فينا مش بيحب المكرونة كلنا تقريبا
بنحبها سواء بالصلصة او البشاميل ، بس برضو بنزهق من تكرارها ، النهارده هقولكم
على صفة للمكرونة رهيبة كل اللي اكلها وقع في حبها الوصفة هي " مكرونة
بالخضار والصوص الابيض " .
المقادير:
- كيلو مكرونة اي نوع بتفضليه .
- نصف كيلو صدور فراخ مخلية مقطع مكعبات .
- خضروات متنوعة نقول ربع من كل نوع ( كوسة ،
جزر ، بروكلي ، مشروم ، فلفل الوان ) .
- بصلة مفرومة .
- 4 فصص ثوم مفرومين .
- ملح وفلفل وبهارات .
- مكعب مرقة دجاج .
مقادير الصوص الابيض :
-نصف كيلو لبن .
- 4 معالق كريمة لباني .
- 2 معلقة دقيق .
- 2 معلقة زبدة .
- مكعب مرقة دجاج مذاب في ربع كوب مياة مغلية.
طريقة الطبخ وطريقة التقديم في الصفحة التالية وكمان هتلاقوا فيديو جميل .
↚
الطريقة:
هنسلق المكرونة بالطريقة المعتادة وهنضيف لها
ملح بس ومش هنضيف زيت لان الزيت مش بيخلي الصوص يندمج مع المكرونة وتتشربه بسهوله
، خلصنا سلق المكرونة هنسيبها على جنب تتصفى على مهلها من الماية على ما نكمل باقي
الوصفة .
الاول هنحضر الصوص الابيض ويكون جاهز قبل ما
نعمل باقي الوصفة ، على عكس البشاميل احنا هنسخن اللبن ومعاه الكريمة ومكعب مرقة
الدجاج المذاب في ربع كوب ماية وونقلب 2 معلقة زبدة مع 2 معلقة دقيق على النار في
طاسة وننزل بيهم على باقي المكونات ونضيف الملح والفلفل الاسمر ونقلبهم بالمضرب
اليدوي ونسيبهم على جنب لحد ما نخلص باقي الوصفة.
هنحضر الخضار ونغسله كويس جدا بالماية والخل
وهنقطع الكل لشرائح بس هنكون فصلينهم عن بعض هنجيب حلة كبيرة شويتين عشان كل المقادير
هتبقى فيها ، هنشوح البصلة المفرومة مع الثوم المفروم وننزل عليهم بصدور الفراخ
المكعبات ونضيف الملح والفلفل الاسمر والبهارات ومكعب مرقة الدجاج.
ونقلب لحد ما
تبداء تستوي هننزل عليها بالجزر والمشروم ونقلب دقيقتين على النار وننزل بالكوسة
والبروكلي هنقلب شوية كمان لحد ما الفراخ خلاص استوت والخضار ميكونش مستوس اوي
عاوزينه نص سوى ، هنضيف عليهم الصوص الابيض اللي احنا مجهزينه من قبلها وبعد ما
يغلي معاهم هننزل بالفلفل الالوان ونظبط الملح ونرفعه من على النار .
في الصفحة الجاية هنعرف طريقتين للتقديم ونتفرج على الفيديو .
↚
في طريقتين للتقديم :
-اول واحدة هنقلب المكرونة مع الخضار والصوص
ونقدمها .
- تاني واحدة ودي احلى في الشكل وتليق
بالعزومات ، اننا بنحط المكرونة في طبق التقديم وفوقيها الصوص بالخضار .
وان شاء الله الوصفة هتعجبكم جدا والاطفال
كمان هيحبوها ، واحلى حاجة فيها انها شاملة كل العناصر الغذائية ( الخضار والبروتين
والنشويات وحتى الكالسيوم موجود في الصوص الابيض) والف هنا وشفاء مقدما وصحتين
على قلبكم .
شوفوا الفيديو ده وأدعولي:
تعليقات: 0
إرسال تعليق