وصفات دودي
مين فينا مش بيخاف من اننا نأكل اولادنا
منتجات مضرة بيهم ، كلنا بنحب اللانشون بس كلنا بنخاف برضو منه ، الوصفة دي هنعمل اللانشون
بنفسنا في بيتنا من مكونات عارفينها واكترها
متوفر دايما عندنا .
المقادير :
-4 بيض كبير .
-4 مثلثات جبنة نستو (اي نوع بتحبيه ).
- 5 معالق كبيرة دقيق.
- بهارات ( بابريكا ، ثوم بودر ، بصل بودر ،
حبهان مطحون ، ورق لورا مطحون ).
- ملح وفلفل اسمر.
- ربع كوب زيت.
- 2 مكعب مرقة دجاج.
- لون أحمر ( للطعام ) .
الطريقة :
كل شغلنا هيكون بالخلاط فقط ، هنحط كل
المكونات السائلة الاول ( البيض و الزيت والجبنة النستو ) ، وهنحط معاها البهارات
وهنفتت مكعبين مرقة الدجاج معاهم والملح والفلفل الاسمر واللون الاحمر هنحط منه
على طرف المعلقة مش كتير وهنضربه في الخلاط لحد ما يتجانسوا كلهم مع بعض ،وبعدين
ننزل عليهم بالدقيق وهنكمل ضرب الخليط في الخلاط دقيقة مش اكتر .
هنكون مجهزين علبه على شكل اسطوانى تستحمل
الماية المغلية عشان تدينا نفس شكل اللانشون ( ممكن نستخدم علبة الماشروم او
الكومبوت الكبيرة ) ، هنحط جوه العلبة كيس حراري كبير لانه صحي اكتر ، وننزل
بالخليط فيه وهنسيب فوق اللانشون مسافة في الكيس ونقفل الكيس بالغالق الخاص بيه ،
وهنجيب حلة كبيرة ونحط العلبة في وسطها وحواليها ماية مغلية ونغطيها ونسيبها على
النار لحد ما الخليط يستوي هو تقريبا هياخد في حدود ساعة .
شوفوا باقي الوصفة ، أضغطوا على التالي وعلشان كمان تشوفوا فيديو توضيحي .
↚
هنطلعة يبرد ونحطه في
الثلاجة لحد ما يجد ونقطعه ونحفظه في علبة ، ومدة صلاحيته 4 ايام في الثلاجة ،
ممكن بقى نفنن ونضيف للانشون اي حاجة احنا عاوزينها ، زيتون مخلي، بسطرمة ، فلفل
اسمر حبات ، كل ده طبعا واحنا لسه نحطه في العلبة مش بعد ما يستوي ، بكده هنكون
عملنا لانشون صحي بنفسنا وبدون اي مواد حافظة ، في هيستغرب انه بدون لحوم بس جربوه
وعلى ضمانتي مش هتجيبوا لانشون من بره تاني ، والف هنا وشفاء مقدما ، وصحتين على
قلبكم .
أتفرجوا على الفيديو وتحياتي ليكم :
تعليقات: 0
إرسال تعليق